雅虎香港新聞 【電影LOL】一心靠中國票房回本 《花木蘭》終於上畫 內地網民瘋狂負評
迪士尼今年其中一套矚目之作，映期經歷一波三折。先有女主角劉亦菲於微博發表撐警言論，引發香港觀眾不滿，發起「＃杯葛花木蘭」（#boycottmulan)行動。可能香港市場細，迪士尼無視抵制聲音，繼續做宣傳，不過因為新冠疫情，原本3月底公映嘅《花木蘭》，即使首映都做埋都被逼叫停！
美國主流媒體年初已經先睹為快，對套戲評價不過不失，主要讚戲服場景做得靚、有多場武打場面，同埋讚鞏俐幾咁搶鏡！無錯，好多美國影評媒體包括Vanity Fair、Cinema Blend等，注意力去晒鞏俐飾演嘅女巫，反而女主角劉亦菲被評角色無發揮，兼且成套戲得一個表情！
就算評價中規中距，本住新版「花木蘭」同「全亞裔演員」2個賣點都夠吸引美國觀眾入場嘅……本來！疫情令各地封閉後重啟進度不一，戲院都唔知開唔開，好不容易捱到9月，迪士尼決定正式上映，點知又遇上美國警暴引起「＃blacklivesmatter」運動，香港網民年頭發起嘅「杯葛木蘭」行動終於引起外媒注意，Harpers Bazaar、Bloomberg、CTV news、Refinery29、NBCN等外媒，都有專題報導點解香港、台灣、泰國等地要杯葛花木蘭，得到唔少美國人聲援！
咁都唔夠，迪士尼偏偏做咗個好有趣嘅決定︰北美地區唔上戲院，直接放喺自家串流平台以美金30蚊任睇！連同期推出《天能Tenet》嘅華納高層都話，睇唔透迪士尼呢個舉動。結果，高昂嘅費用嚇窒唔少觀眾，寧願唔睇！
面對咁多負面聲音，靠攏內地市場嘅迪士尼一於懶理，集結劉亦菲、李連杰、鞏俐同甄子丹幾粒巨星，一心睇住內地龐大票房回本，點知中國版海報一出，內地網民唔客氣劣評如潮勁鬧老土！
最妙嘅係，套戲預定9月11日先正式公映，但內地電影網站時光網、豆辨等，已經分別出現幾萬條差評，主要評價話電影武打場面無睇頭、甄子丹成套戲嘅武打場面加埋仲少過《葉問》條預告片（！）、劇本好唔掂等。搜狐直頭狠評「沒文化，沒場面，更沒演技」、「5.9分的電影《花木蘭》上映，有多爛？觀眾表示爛到想笑」！
到底杯葛行動加劣評，有幾影響《花》中國票房，要等上映先知。不過上網搜尋「花木蘭」，都得出排山倒海嘅結果，論宣傳曝光一流。北美市場有評價無票房，亞洲地區連內地都負評不斷，2億美金鉅製嘅《花》兩邊市場都唔討好，算得上係近年電影奇葩！
更多電影文章
【電影LOL】脫離皇室自立 哈里同梅根簽Netflix拍片賺1億美金
【電影LOL】Netflix為跑數 開放免費內容 《生化危機》改編拍電視劇
【電影LOL．地道鬼節影院】《熱血青年》救人變成害人 恐怖女鬼原來係港姐
