雅虎香港新聞 【留家抗疫】10套留家抗疫必睇劇集 梗有一套啱你
新型冠狀肺炎疫情嚴重，唔少公司都要求員工在家工作，政府亦呼籲市民減少外出，齊心抗疫。既然要留喺屋企，當然要煲下劇消磨一下時間，等我哋同大家介紹近期熱爆嘅劇集啦～
《戀愛可以持續到天長地久》
劇集由佐藤健及上白石萌音主演，早前播出時隨即成為熱話。劇情講述女主角對佐藤健飾演嘅天堂醫生一見鍾情，為咗追到心目中嘅男神而想盡辦法。唔少女觀眾更加被「天堂醫生」迷倒，單身人士睇完套劇仲話「想戀愛了」。
《屍戰朝鮮》
由朱智勛、裴斗娜及柳承龍等人主演嘅Netflix首套原創韓劇《李屍朝鮮》第二季（前名《李屍朝鮮》），除咗睇主角們精湛嘅演技之外，當然仲要睇一眾喪屍們嘅逼真演出啦！一個發生喺朝鮮時代嘅喪屍故事，有宮鬥、喪屍及緊張刺激嘅劇情，唔少觀眾睇完都話好想快啲有得睇第三季。
《再見媽媽又再見》
《再見媽媽又再見》係金泰希產後復出之作，劇情講述佢喺劇中飾演一名因意外去世咗5年嘅媽媽，佢參加咗一個「 49天投胎計劃」，為見老公和女兒一面。劇集除咗有催淚鏡頭之外，亦夾雜唔少搞笑場面，成功吸引一班媽媽輩觀眾主持。
《梨泰院Class》
由朴敘俊、金多美及權娜拉等人主演嘅韓劇《梨泰院Class》，改編自韓國高人氣網路漫畫，劇情講述朴世路(朴敘俊飾）父親在一場意外中去世，辛苦工作咗7年，喺首爾梨泰院開設小酒館，並向害死爸爸嘅人報復。雖然劇集已經播映完畢，不過話題熱度依然居高不下，而男主角朴敘俊更成為新一代男神。
《愛的迫降》
劇集由玄彬與孫藝珍主演，講述韓國財閥繼承人尹世利（孫藝珍飾）因滑翔傘出事而降到北韓，一連串嘅故事令佢愛上默默守護佢嘅北韓特級軍官（玄彬飾）。劇集備受亞洲觀衆追捧，主要係睇靚人、靚景同埋靚衫。
《二月廿九》
ViuTV愛情穿越劇《二月廿九》搵嚟由吳海昕、徐天佑及劉俊謙主演，劇集播出以嚟討論度爆燈，唔少觀眾都大讚劇集有新意，係近年難得一見嘅佳作。劇情主要講述2月29日出生嘅Yeesa（吳海昕飾）喺2017年2月28日幫為自己慶祝生日，一吹蠟燭就突然穿越時空去到2020年嘅北海道，仲重新邂逅兩位未來人Ryan（徐天佑飾）同埋余家聰（劉俊謙飾）。
《想見你》
由柯佳嬿及許光漢主演嘅《想見你》，集科幻穿越、推理懸疑及青春愛情於一身，被譽為「最燒腦台劇」。劇情講述2019年嘅黃雨萱因意外回到1998年，靈魂穿越成為陳韻如，仲遇到同佢過咗身嘅男朋友生得一模一樣嘅李子維、同埋守候陳韻如嘅莫俊傑。之後，黃雨萱嘗試改變陳韻如及各人未來嘅命運。許光漢憑劇集一炮而紅，更被獲封「國民男友」。
《魔鑰傳》（Locke & Key）
劇集改編自2008年出版嘅同名漫畫小說，故事就講主角在父親被殺後，同弟妹搬回家鄉古老大宅Keyhouse，喺大宅找到唔同功能嘅鑰匙，從而獲得神秘力量，而且每一條的力量都不同，之後就當然有壞人想搶，可能會吸引到對魔幻同驚悚題材有興趣嘅你。
《不了》（I Am Not Okay With This）
劇集由《怪奇物語》（Stanger Things）同埋《X你的世界末日》（The End of the F***ing World）嘅製作團隊聯手打造，淨係睇呢個團隊就已經值得喺你嘅「Must Watch」名單啦！劇情主要講述Sydney（Sophia Lillis飾）嘅父親自殺，佢一直未能走出傷痛，一直要處理家庭問題、校園生活及愛情。後來就發現自己喺發怒時，佢會有摧毀性超能力，之後受呢股神秘力量控制而捲入麻煩。
《西部世界》（Westworld）
《西部世界》喺2016年播出後都深受觀眾喜愛，第三季終於喺3月中回歸。故事背景設定於未來世界，主要講述被稱為「西方極樂園」未來主題公園，而園入面有同人一模一樣的機械人，提供給遊客殺戮與性慾嘅滿足感。
