「香港影壇四大惡人」走咗兩個 重溫佢哋經典角色

如果要數香港電影經典壞人，相信「香港影壇四大惡人」（何家駒、成奎安、黃光亮及李兆基）一定榜上有名，佢哋飾演嘅壞人或古惑仔角色都入型入格而深入民心，真係隔住個螢光幕都感覺到佢哋嘅殺氣呀！四大惡人之一嘅李兆基，近年因為2度中風而深居簡出，最近更確診肝癌，身體日漸消瘦。唔知大家仲記唔記得佢哋做過邊啲經典角色呢？

何家駒

被封為「四大惡人之首」嘅何家駒，憑87年電影《監獄風雲》飾演大反派大咪而為人熟悉，劇中佢仲做二五仔出賣獄友。另外，佢喺電影《獄中龍》嘅馬超、《替天行道之殺兄》嘅黄冠華及《滅門慘案之孽殺》嘅麥泉，同樣令大家留下深刻印像。自00年後佢已經冇再拍電影，不過佢喺14年為電影《壹獄壹世界：高登闊少踎監日記》客串飾演大咪。不過可惜佢喺15年因器官衰竭病逝，終年66 歲。

成奎安

綽號大傻嘅成奎安，其實佢一啲都唔傻㗎。佢係1987年電影《監獄風雲》中飾演「大傻」一角，自此「大傻」呢個名就跟佢一世。由於他身形高大樣貌兇狠，所以每次導演搵人做江湖大佬呢類嘅惡人角色都會唸起佢。唔知大家又有冇試過俾佢嚇親過呢？其實佢除咗惡霸角色之外，佢都成日喺笑片飾演一啲魯莽衝動嘅「懶醒目」角色，例如《賭神》及《賭俠》中嘅朱先生。可惜佢於2009年因鼻咽癌擴散病逝，享年54歲。

李兆基

現年69歲嘅李兆基，一張飽歷風霜嘅面孔，只需要一個眼神已經令你不寒而栗。曾經係童黨「慈雲山十三太保」嘅主要成員，其後入電影界成功洗底，當中憑《古惑仔》「吹水基」一角而為人熟識。李兆基亦曾經多次與周星馳合作，演出《食神》、《算死草》同《行運一條龍》等電影。不過15年曾中風，所以已經鮮少露面，最近仲確診肝癌，情況令人擔心。而佢雖然看盡人情冷暖，卻無埋怨任何人，同佢以往演出嘅角色性格剛好相反。

黃光亮

黃光亮喺1983年拍攝電影《摩登衙門》正式出道，多年嚟都係主要飾演惡人及小人物，電影《監獄風雲》中飾演「傻標」一角而為人熟悉，呢個角色仲令佢獲提名香港電影金像獎最佳新人獎項，奠定咗佢喺香港電影中惡人之一嘅地位。近年拍咗唔少無綫劇集，例如《老表，你好嘢！》、《火線下的江湖大佬》及《果欄中的江湖大嫂》等等。